कला र साहित्य राजनीति समाचार

प्रधानमन्त्रीको समृद्धि सपना : गृहनगरमा मात्रै अर्बौंका दर्जन परियोजना

२९ साउन, काठमाडौं । प्रधानमन्त्रीको पदभार सम्हालेदेखि नै केपी शर्मा ओलीले ‘समृद्ध नेपाल सुखी नेपाली’को नारा लगाउँदै आएका छन् । उनले अधिकांश भाषणमा समृद्धिको यो प्रसंग हत्तपत्त छुटाउँदैनन् ।

देश समृद्धिको नारा दिएका प्रधानमन्त्री साच्चै यो अभियानमा खरो उत्रिएका छन् त ? कान्तिपुर दैनिकले आज प्रधानमन्त्री ओलीले आफ्नो निर्वाचन क्षेत्रमा पारेको परियोजनाको रौंचिरा केलाउँदै उनको भनाइ र गराइमा तादम्यता नदेखिएको निष्कर्षसहितको समाचार छापेको छ ।

कान्तिपुरका अनुसार प्रधानमन्त्री ओलीको गृहनगर दमकमा करिब १ दर्जन ठूला विकासे कार्यक्रम र परियोजना उनकै पहलमा सञ्चालन हुँदै छन् । एउटै परियोजना १५ अर्ब रुपैयाँसम्मको छ । केही परियोजनामा काम धमाधम भइरहेको छ भने अन्य प्रक्रियामा छन् ।

देवेन्द्र भट्टराई र अर्जुन राजवंशीको सयुक्त ‘बाइलाइन’मा लेखिएको समाचारमा भनिएको छ– ओलीले पहिलोपटक प्रधानमन्त्री हुँदा ०७२ मा दमकमा विश्वकै अग्लो बुद्धमूर्ति बनाउने भनी गरेको घोषणा कार्यान्वयनमा आउन लागेको छ । दमकको उत्तर सिरान हम्से–दुम्से सामुदायिक वन क्षेत्रमा ५४२ फिट अग्लो बुद्धमूर्ति निर्माण गरेर दमक र लुम्बिनीलाई बुद्ध–सर्किटसँग जोड्ने योजनामा नगरपालिका कार्यालयले डीपीआर तयार गरिसकेको छ । १५ अर्बभन्दा बढीको लगानीमा बुद्धमूर्ति निर्माण गर्न लागिएको हो । यसका लागि ५ बिघा १२ कट्ठा जमिन प्राप्त भइसकेको छ ।’

प्रधानमन्त्री ओलीको निर्वाचन क्षेत्रको योजना यतिमै सकिन्न । कान्तिपुरका अनुसार दमक–३ मा १८ तले भ्यु टावर निर्माण प्रक्रिया पनि अघि बढेको छ । सहरी विकास मन्त्रालयले करिब ३ अर्बको लागतमा सुविधासम्पन्न टावर निर्माण गर्न लागेको हो । यसको ठेक्का सम्झौता भइसकेको छ ।

त्यसैगरी, २ अर्बमा विज्ञापन पार्क, १ अर्ब ३७ करोडका पुल, २९ करोडमा सभागृह, १५ करोडमा पशुपन्छी बजार र १ करोड २५ लाखमा नमूना मार्गसमेत निर्माण हुँदैछन् ।

अन्नपूर्णले प्रधानमन्त्री केपी शर्मा ओलीको सक्रियता बारे समाचार बनाएको छ । समाचार अनुसार, ओलीले स्वदेश फर्केलगत्तै आफ्नो राजनीतिक भेटाघाटलाई तीव्र पारेका छन् । पार्टीभित्रका सांगठनिक समस्या निरूपणका निम्ति प्रधानमन्त्रीको सक्रियता यस्तो सक्रियता देखिएको समाचारको सार छ ।

सशस्त्र प्रहरीका निवृत्त उच्च अधिकारीले संगठनको जनशक्ति दुरुपयोग गरेको विषयलाई अन्नपूर्णले मुख्य समाचारको रूपमा छापेको छ । समाचार अनुसार सशस्त्रका महानिरीक्षकदेखि नायब महानिरीक्षकसम्मका सेवा निवृत्त पदाधिकारीले सरकारको नीतिविपरीत संगठनको जनशक्ति दुरुपयोग गरेका छन् ।

नागरिकले १ वर्षभरि आयात भएको सुनको हिसाब निकालेको छ । नागरिकका अनुसार, १ वर्षमा साढे ३४ अर्बको सुन आयात भएको छ ।

किसानको साथी गाइने किरा संकटमा परेकोसम्बन्धी सामग्री गोरखापत्रमा छ भने कारोबारले दूरसञ्चार कम्पनीका ग्राहकबारे मुख्य समाचार बनाएको छ । स्रोत – आजाका पत्रपत्रिका

Leave a Reply

Your email address will not be published. Required fields are marked *